АҞӘА, хәажәкыра 17 – Sputnik. Аԥсны атуризм аминистрра XXVIII Жәларбжьаратәи атуристтә цәыргақәҵа MITT-2022 иалахәхоит Москва ҳәа арадио Sputnik иазеиҭеиҳәеит аусбарҭа аинформациатә ҟәша аиҳабы Саид Аршба.
"Аԥсны астенд аҿы иӡыргоуп Аԥсны асасааирҭақәеи атуроператорцәеи, Аԥснытәи ахырхарҭаҟны аус зуа урыстәылатәи атуроператорцәа. Ацхыраара ҳнаҭоит Аԥсны Ахәаахәҭра-ааглыхратә палата. Иара аԥснытәи аалыҵ ӡырнагоит. Аԥсны аинтерес рыманы иҳадҵаало рацәаҩуп", - иҳәеит иара.
Саид Аршба иҳәеит адәныҟаполитикатә ҭагылазаашьа иахҟьаны MITT-2022 алахәылацәа шырацәам. Иара убри азы аҩнуҵҟатәи атуризми аԥснытәи ахырхарҭеи аԥхынтә ԥсшьаразы ганкны еицахәаԥшуеит.
Атуризм аминистрра аделегациа напхгара аиҭоит аминистр Ҭеимураз Хышба. Иара иажәақәа рыла асеиԥш ауснагӡатәқәа рылахәхара лшара бзиоуп ареспублика иамоу атуризм аганахь ала алшарақәа раарԥшразы, Аԥсны ахьӡ аларҵәаразы.
Ацәыргақәҵа аҳәаақәа ирҭагӡаны Аԥсны ахаҭарнакцәеи Венесуелеи Ермантәылеи рҟынтәи рколлегацәеи дареи еиԥылараны иҟоуп.
"Арҭ аиԥыларақәа ԥхьаҟатәи аусеицура иацхраауеит. Ҳтурбизнес ахаҭарнакцәа иазгәарҭоит ацәыргақәҵаҟынтәи иззыԥшыз шроуз. Имаҷҩым атуроператорцәа Италиа, Африка, Египет аус зуаз, ртурқәа рахь Аԥснытәи ахырхарҭа аҵазыркыз", - иҳәеит Саид Аршба.
Сынтәатәи ацәыргақәҵа MITT-2022 иалахәуп 18 тәыла: Азербаиџьан, Ермантәыла, Ҟазахстан, Таџьикистан, Киргизстан, Ҭырқәтәыла, Алжир, Египет, Белорусиа, Малаизиа, Доминикантәи Ареспублика, Индонезиа, Филиппины, Уганда, Израиль, Таиланд, Кипр, Болгариа, Танзаниа.