АҞӘА, хәажәкыра 21 - Sputnik. Аԥсны Адәныҟатәи аусқәа рминистр Инал Арӡынба Урыстәыла Адәныҟатәи аусқәа рминистр Сергеи Лавров иирамш идиныҳәалеит ҳәа аанацҳауеит Аԥсны ААР Амедиацентр.
Арӡынба Лавров ҳаамҭазы иналукааша дипломатуп ҳәа изиҳәеит.
"Шәара шәҟазара ҳараки акыр шықәса Урыстәыла аинтересқәа реиқәырхара азықәԥареи, шәылшамҭақәеи адунеи зегь аҟны шәыхьӡ аҳаракра рылдыршеит. Шәара шәнапхгарала Урыстәылатәи Афедерациа Адәныҟатәи аусқәа рминистрра адәныҟаполитикатә усура аҩаӡара ҳаракы амоуп", - ҳәа аҳәоит адныҳәалара атекст.
Иара инаҵшьны иазгәеиҭеит иуадаҩу агеополитикатә ҭагылазаашьа аан Сергеи Лавров ипрофессионализм, ихаҭара аазырԥшуа аҟазшьақәа, Аԥсадгьыл аинтересқәа ахадараҿы рыргылара, иԥышәа ду зыда ԥсыхәа амам ракәны иҟоуп ҳәа.
Адәныҟатәи аусқәа рминистр игәалаиршәеит 2021 шықәса ԥхынҷкәынмзазы Шәача имҩаԥысыз реиԥылара. Агәрагара ҟаиҵеит адәныҟаполитикатә усбарҭақәа ԥхьаҟагьы русура ишацҵахо азы.