АҞӘА, хәажәкыра 22 – Sputnik, Бадраҟ Аҩӡба. Санкт-Петербургтәи "Зенит" Гагра араион Цандрыԥшь ақыҭан аспорттә база аргылара агәҭакуп ҳәа иҳәеит аклуб азыҟаҵаҩцәа рҟазареи разыҟаҵареи реизырҳаразы Ацентр адиректор Сергеи Морозов.
" Ашьапылампылтә клуб "Зенит" адиректорцәа Рхеилак иаӡбеит академиа ашьапылампыласыҩцәа рзы аспорттә база ргылазарц. Уажәы аиҿкааратә зҵаарақәа ирылацәажәоит. Иазырхиоуп апроект, аԥснытәи аган иадыруа", – иҳәеит иара.
Аспорттә база Аԥсны аспорт аҿиара иацхраауеит, академиа "Зенит" ашьапылампыласыҩцәа ҿарацәагьы рзанааҭтә ҿиара иацхраауеит ҳәа иҳәеит Морозов.
"Ҳара иҳалшо зегь ҟаҳҵалоит аԥснытәи ахәыҷқәа рҟазара иацырҵарц. Иҳагәҭакуп ашьапылампыласырҭатә дәқәа, аспорттә базақәа, аӡҭарчқәа рыргылара. Иҟалап, шықәсқәак рышьҭахь уи зегь ҟалар", - ҳәа иҳәеит иара.
Сергеи Морозов иҳәеит иҟоу аԥкрақәа инарымаданы "Зенит" акоманда аҽазыҟаҵарақәа Цандрыԥшь имҩаԥнагалар шауа.
"Аргыларақәа рыҿҳәара сызшәаҳәом. Иҟалап, шықәсык аҩнуҵҟа акәхар. Сгәы иаанагоит аргыларақәа ҳашрылагалак зегь ырццакхоит ҳәа", - иҳәеит Морозов.
Аԥсны ашьапылампыл азы Афедерациа аиҳабы Ҭарашь Ҳагба аспорттә база аргылара хра злоу усны дахәаԥшуеит.
"Арҭ рҩызцәа абазақәа Аԥсны иҟан асовет аамҭазы. Аргылара акәзар, аԥсуа шьапылампыл аҿиара иацхраауеит. "Зенит" акомандаҿ еиуеиԥшым ақәратә категориақәа ыҟоуп. Урҭ ара еиуеиԥшым ауснагӡатәқәа мҩаԥыргалоит", - ҳәа иҳәеит иара.
Ашьапылампылтә клуб "Зенит" Академиа Аԥсны иаатит хәажәкыра 27, 2021 шықәсазы. Иахьатәи аамҭазы академиа афилиал Гәдоуҭа иҟоуп 2012-2013 шықәсқәа рзы ииз рыла ишьақәгылоу агәыԥқәа, Афон ҿыц - 2008-2009 ашықәсқәа рзы ииз, Аҟәа - 2010-2013 ашықәсқәа рзы ииз.