АҞӘА, хәажәкыра 26 – Sputnik, Бадри Есиава. Гагреи Гәдоуҭеи араионқәа рҟынтәи алхратә ҭыԥ хадақәа ԥшьба рҿы асабша, асааҭ 14:00 рзы инеиз рхыԥхьаӡара 24% - 57% инаӡон ҳәа Sputnik акорреспондент изеиҭарҳәеит алхратә ҭыԥ хадақәа ркомиссиақәа рхантәаҩцәа.
Гагратәи ақалақьтә алхратә ҭыԥ хадаҿы асааҭ 14:00 рзы инеиз рхыԥхьаӡара 24% ыҟан, 6848-ҩык рҟынтәи 1706-ҩык рыбжьы рҭиихьан. Акомиссиа ахантәаҩы Давид Гьезердаа иажәақәа рыла, алхрақәа мҩаԥысуан еилагарада. Оҭҳаратәи алхратә комиссиа ахантәаҩы Мирон Чакветаӡе иажәақәа рыла, асааҭ 14:00 рзы 1326-ҩык рыбжьы рҭиит 3100-ҩык рҟынтәи. Ари асиақәа рҿы иарбоу рҟынтәи 42% инаӡеит.
"Ауаа рактивра бжьаратәуп. Аҭыԥқәа рҿы ҭынчроуп, еилагарак аӡәгьы иазгәеимҭацт", - ҳәа иҳәеит иара.
Афонҿыцтәи акомиссиа ахантәаҩы Вероника Белиаева лажәақәа рыла, ауаа ргәалаҟазаара бзиоуп, рнеира акәзар, асааҭ 14 рзы 42% алхыҩцәа рыбжьы рҭиит: 1100-ҩык 2598-ҩык рҟынтәи.
"Еилагарак азгәаҭам. Активла ауаа ааиуеит. Аԥхьатәи атур аан ауаа рааишьа 60% инаӡон. Уажәгьы ари арбагаҟынӡа ҳнеип ҳәа сыҟоуп. Алхырҭатә ҭыԥқәа зегьы рҿы сыҟан. Зехьынџьара ҽыԥныҳәа ыҟам", - ҳәа лҳәеит Белиаева.
Аацытәи 20-тәи алхратә ҭыԥ хадаҿгьы иҭынчроуп. Ахантәаҩы Роман Гамсаниа асааҭ 14:00 рзы еилагарагь ыҟам, ҽыԥныҳәагь ыҟам ҳәа азгәеиҭеит.
Ари аамҭазы 50% рыбжьы рҭиит: 1950-ҩык 3700-ҩык рҟынтәи.
20-тәи алхратә ҭыԥ хада иаҵанакуа Ҭасраҟәа ақыҭан алхырҭатә ҭыԥ аҿы акомиссиа ахантәаҩы Милана Тәанԥҳа илҳәеит асааҭ 12:00 рзы 70-ҩык рыбжьы шырҭихьаз 267-ҩык рҟынтәи, ҩ-сааҭк рышьҭахь - 153-ҩык рыбжьы рҭиит.
"Аҭагылазаашьа маншәалоуп. Уадаҩрак ыҟам. Анаԥшыҩцәа рхымҩаԥгашьа шьахәуп. Азакәан аилагара алмыршахарц иахәҭоу аусурақәа мҩаԥаагоит", - лҳәеит лара.