АҞӘА, хәажәкыра 28 – Sputnik, Бадри Есиава. Хосҭа имҩаԥысуаз ирццакны ашахмат асраз аицлабра аҟны актәи аҭыԥ аанылкылеит быжьшықәса зхыҵуа гагратәи ашахматасҩы Нила Бганԥҳа, аҩбатәи аҭыԥ даԥсахеит гәдоуҭатәи аспортсменка Александра Аҩӡԥҳа, абри атәы иҳәеит Гәдоуҭатәи ахәыҷтәы- ақәыԥштә аспорт школ ашахмат азыҟаҵаҩ Альберт Карапетиан.
Краснодартәи атәылаҿацә ашахматтә федерациа Александра Аҩӡԥҳа иланаршьеит аҩбатәи ақәыԥштә аспорттә аҟазараҩаӡара ҳәа иҳәеит Карапетиан. Аҟазараҩаӡара ланашьара абзоуроуп аицлабраҟны иаанылкылаз аԥхьахәтә ҭыԥ. Нила Бганԥҳа лиааира ас еиԥш иҟоу аицлабрақәа рыҟны раԥхьатәиуп азын аҟазараҩаӡара ланарымшьаӡеит.
"Ахәыҷқәа аицлабрақәа ианрылахәу рыҩаӡара шьҭыҵуеит. Уи шаҟа еизҳауа ааҟара аҟазараҩаӡарагь еизҳауеит. Ҿырԥштәыс иаагозар Александра уажәшьҭа аҩбатәи ақәыԥштә аҟазараҩаӡара лымоуп лаԥхьаҟа иацылҵар актәи лоуеит, анаҩс адуцәа рспорттә аҟазараҩаӡарахь диасыр ҟалоит", - иҳәеит Карапетиан.
Ирццакны ашахматасзразы Хосҭа имҩаԥысуаз аицлабра иалахәын 84-ҩык аспортсменцәа. Аԥснытәи иалахәын хәҩык ашхматасыҩцәа.