АҞӘА, хәажәкыра 28 - Sputnik. Аԥсны Аҿари аспорти рзы аҳәынҭқарратә еилакы аспорт аҟәша аиҳабы Жанна Занҭариа иланашьоуп "Ахьӡ-аԥша" аорден III аҩаӡара, абри атәы аанацҳауеит аҳәынҭқарра ахада исаит.
"Абаҩрҵәыреи аспорти русхк аҟны шықәсарцәалатәи лыҵшәа змоу лусуразы, иҳараку лзанааҭҩаӡараз Аԥсны аҳәынҭқарра абаҩрҵәыреи аспорти зҽрыԥсазтәыз аусзуҩы Занҭария Жанна Џьота-иԥҳа иланашьоуп "Ахьӡ-Аԥша" аорден", - ҳәа аҳәоит аусԥҟа аҟны.
Абри азы Аусԥҟа инапы аҵаиҩит Аԥсны Аҳәынҭқрра Ахада Аслан Бжьаниа.
"Ахьӡ-аԥша" аорден III аҩаӡара ранаршьоит Аԥсны атәылауаа еиуеиԥшым аусхкқәа рыҟны зыжәлар рҿаԥхьа зылшамҭақәа рацәоу, иара убас аспорт аҿиараҟны зџьабаа рацәоуи жәларбжьаратәи аицлабрақәа рыҟны аиааирақәа згази.