АҞӘА, мшаԥы 2 - Sputnik. Амедиагәыԥ "Россия сегодня" аредактор хада Маргарита Симониан Шәача "Аԥснытәи аинвестициатә форум" аӡыргаратә аартраҟны дықәгылоит, абри атәы аанацҳауеит Аԥсны ААР Амедиацентр.
Аԥсны аинвестициақәа ринтерес цәырызго афорум мҩаԥгахоит асабша, мшаԥы 2 рзы, Шәача асасааирҭа "Hyatt Regency Sochi" аҟны.
Афорум иалахәхоит Аԥсны Ашәарҭадаратә хеилак амаӡаныҟәгаҩ Сергеи Шамба, Аԥсны Адәныҟатәи аусқәа рминистр Инал Арӡынба, Аекономика аминистр лхаҭыԥуаҩ Ҭемыр Амқәаб, Аԥсны Ахәаахәҭра-ааглыхратә палата аиҳабы Ҭамила Мерцхәлаа, иара убас аҳәынҭқарратә усбарҭақәа рхаҭарнакцәеи аԥснытәии урыстәылатәии анаплакыҩцәеи.
Афорум мҩаԥыслоит ахәаахәҭра-економикатәии аинвестициатәии усхкқәа рҟны Аԥсны ианыруа Урыстәыла арегионқәа рҿы. Аԥсны Адәныҟатәи аусқәа рминистр Инал Арӡынба "Аԥснытәи аинвестициатә форум" аԥҵареи ахыдҵа хадақәеи ртәы дазааҭгыло, иҳәеит, Аԥсны иамоу аинвестициатә лшарақәа рааԥшра ауп ҳәа. Афорум аихшьалақәа рыла регионцыԥхьаӡа еиҿкаахоит аусутә гәыԥқәа.
Иахьазы Адәныҟатәи аусқәа рминистрраҿы афорум амҩаԥгаразы аилацәажәарақәа мҩаԥнагоит Москватәи, Тулатәи, Ростовтәи аобластқәа, Санкт-Петербург уҳәа рнапхгаҩцәа рҿы.