ШӘАЧА, мшаԥы 2 – Sputnik, Бадраҟ Аҩӡба. Аԥсны аинвестициақәа ралагаларазы ихьазырԥшуа Афорум аатит Шәача асасааирҭа "Hyatt Regency Sochi" аҿы асабша, мшаԥы 2 рзы.
"Иахьа ҳара "Аԥснытәи аинвестициатә форум" актәи аилатәара мҩаԥаагоит. Ҳаԥхьа дҵа хадас иқәҳаргыло - Аԥсны иҟаҵәҟьоу аҭагылазаашьа аарԥшра, закәанԥҵаратә аԥшьгамҭақәас иҳамоу, иахьатәи аамҭазы имҩаԥысуа ахҭысқәа раан ҳара ҳҿы процессқәас иҟоу", - иҳәеит афорум аартраан Аԥсны Адәныҟатәи аусқәа рминистр Инал Арӡынба.
Мраҭашәара аганахьала асанкциақәа аналагалоу аамҭазы Аԥсны аинвесторцәа рзы еиҳагьы аинтерес аиур алшоит ҳәа инаҵишьит Арӡынба.
Убри азоуп, аминистр иажәақәа рыла, еиуеиԥшым арегионқәа рҿы аинвестициатә форум амҩаԥгара заҳаӡбаз, уи аҳәаақәа ирҭагӡаны Аԥсны иҟоу аҭагылазаашьа аӡбахә ҳҳәалоит, аинвестициақәа радԥхьалара аизырҳаразы ҳтәыла иҟанаҵо ашьаҿақәа цәыраагалоит.
Аусмҩаԥгатә иалахәуп Аԥсны Адәныҟатәи аусқәа рминистр Инал Арӡынба, Аԥсны Ахәаахәҭра-ааглыхратә палата аиҳабы Ҭамила Мерцхәлааԥҳа, аҳәынҭусбарҭақәа русзуҩцәа, амедиагәыԥ "Россия сегодня" аредактор хада Маргарита Симониан, иара убас аԥснытәии урыстәылатәии анаплакыҩцәа.
Афорум мҩаԥгалахоит ахәаахәҭра-економикатәи аинвестициатәи ускқәа рҿы Аԥсны аусацура еиҳа иазҿлымҳахар зылшо Урыстәыла арегионқәа рҿы.
Аԥсны ААР рыҿцәажәоит Москватәи, Тулатәи, Ростовтәи аобластқәа, Санкт-Петербург, егьырҭ Урыстәыла асубиектқәа рхадацәа "Аԥснытәи аинвестициатә форум" дара рҿы амҩаԥгара алыршаразы.
Аԥсны ААР ахада Инал Арӡынба иажәақәа рыла, ари аҩыза аусутә формат ҿыц адҵа хадақәа ируакуп Аԥсны аинвестициатә потенциал ацәыргара.
Афорум аихшьалақәа рыла регионцыԥхьаӡа еиҿкаахоит аинвесторцәа злоу аусутә гәыԥқәа.