АҞӘА, мшаԥы 10 - Sputnik. Аахыҵ Уаԥстәыла ахада иалхрақәа раан рыбжьы арҭеит 82% алхыҩцәа, абри атәы аанацҳауеит Sputnik Аахыҵ Уаԥстәыла.
Зынӡа ареспубликаҿы 32 нызқьҩык инареиҳаны алхыҩцәа ҭаҩуп. Асааҭ хәба рзы зыбжьы хымԥада иазҭашаз рхыԥхьаӡара ҟалахьан, алхрақәа шьақәгылеит ҳәа аҳәамҭа ҟанаҵит АКХ.
Ареспубликахь алхрақәа рхылаԥшразы инеит 65-ҩык анаԥшцәа Аԥсны, Урыстәыла, Донбасс, Шьамтәыла, Венесуела, Австриа, Италиа, Ҭырқәтәыла уҳәа егьырҭ атәылақәа рҟынтәи. Аилагарақәа ҳәа акгьы азгәаҭамызт, Аԥсны Ауаажәларратә палатаҟынтәи анаԥшҩы Роман Каҷараа, иара урҭ ҿырԥшыгоуп ҳәа рхиҳәааит.
Алхрақәа рыҽны иаартын алхратә ҭыԥқәа 76, урҭ рахьтә 72 - Аахыҵ Уаԥстәыла, ҩба - Владикавказ, акака - Москвеи Аҟәеи. Зынӡа икьыԥхьын 40 нызқь биуллетень.
Алхрақәа рылҵшәақәа ирызку раԥхьатәи адыррақәа ҟалоит асааҭ 00:00 рзеиԥш.
Аахыҵ Уаԥстәыла ахадарахьы иқәгылоуп хәҩык акандидатцәа: иахьатәи ахада Анатоли Бибилов, апарламент адепутатцәа Гарри Мулдарови Александр Плиеви, апарламенттә партиа "Ныхас" ахантәаҩы Алан Гаглоев, уаанӡатәи адепутат Дмитри Тасоев.