АҞӘА, мшаԥы 11 – Sputnik, Бадри Есиава. Аԥсны Амилаҭтә библиотекаҿы рыбжьы арҭеит 22-ы ҳәа иҳәеит Аԥсны иҟоу Аахыҵ Уаԥстәыла ацҳаражәҳәаҩ Олег Боциев.
"Аахыҵ Уаԥстәыла атәылауаҩра змоу аҭыԥантәи ауааԥсыра рҟынтәи 22-ы рыбжьы арҭеит. Акандидатцәа рҟынтәи анаԥшыҩцәеи Шәачантә иҟаз алхыҩцәақәаки рыбжьы арҭеит. Аҭагылазаашьа ҭынч имҩаԥысит", - иҳәеит иара.
Боциев иажәақәа рыла абуллетенқәа Аахыҵ Уаԥстәылаҟа инаргоит ареспублика ААР аусзуҩцәа.
Аахыҵ Уаԥстәыла ахадарахьы иқәгылоуп хәҩык акандидатцәа: иахьатәи ахада Анатоли Бибилов, апарламент адепутатцәа Гарри Мулдарови Александр Плиеви, апарламенттә партиа "Ныхас" ахантәаҩы Алан Гаглоев, уаанӡатәи адепутат Дмитри Тасоев.
76 алхырҭатә ҭыԥ аартын, урҭ рҟынтәи 72 ареспублика аҵакыраҿы, 4 – анҭыҵ. Зынӡа икьыԥхьын 40 000 биуллитен.