АҞӘА, мшаԥы 13 - Sputnik. Абла ахирургиа маҷ Ацентр аатит Аҟәа ҳәа еиҭарҳәеит Абаза ТВ аефир аҿы.
Агәабзиарахьчара аминистр Едуард Быҭәба ихы алаирхәит Ацентр аартра.
Ацентр еиқәыршәоуп Иапониа, Германиа, ЕАА рҟынтәи амыругақәа рыла. Дара уадацыԥхьаӡа игылоуп. Ацентр аҿы иҟоуп амикроскоп. Уи ахархәарала аҳақьым ала агәы, аҵа ҭҵааны, аблаҵәца акатаракта ахихыр илшоит.
Амедцентр рылахәхоит Аԥсны агәабзиарахьчара аминистрра апрограммақәа, аԥыжәарала ауааԥсыра ацхыраара рзураҿы.
“Иҟоуп атәылауаа зылшара ԥку, ахшарарацәа змоу, ачымазара ҷыдақәа змоу. Абри аформат аҿы ҳтәылауаа аԥыжәара рыҭахалоит. Уи ҳара ҳалацәажәахьеит", - ҳәа иҳәеит Агәабзиарахьчара аминистр Едуард Быҭәба.
Уажәшьҭарнахыс Аԥсны ауааԥсыра ироуеит алшара атәыла иалымҵыкәа аофтальмологиатә цхыраара аиура.