АҞӘА, мшаԥы 16-Sputnik. Абокс азы аԥхьахә агареи Аԥсны ачемпионати аатит Очамчыра аспорт хан аҟны, абри атәы Sputnik иазеиҭеиҳәеит аҿари аспорти русқәа рзы Аҳәынҭеилакы аҟны аспорт ҟәша аспециалист хада Анзор Ҵәыӡба.
"Аԥсны ачемпионат иалахәуп 17-19 шықәса зхыҵуа аспортсменцәа, абоксиорцәа маҷны излаҳамоу ала аицлабрақәеи аԥхьахәқәа ргареи ирылаҳархәоит ақәыԥшцәагьы. Ачемпионат мҩаԥысуеит адуцәа рыбжьара, аԥхьахәгара аиҵбацәа рыбжьара", -ҳәа иҳәеит иара.
Анзор Ҵәыӡба иазгәеиҭеит, абокс азы аԥхьахә агареи Аԥсны ачемпионати ишалахәу Аԥсны араионқәеи ақалақьқәеи рҟынтәи 120-ҩык аспортсменцәа 2006-2007, 2008-2009, 2010-2011шықәсқәа рзы ииз.
Ачемпионат аҟны аӡбаҩ хадас дыҟоуп урыстәылазегьтәии жәларбжьаратәии аҩаӡара змоу аӡбаҩ Валериан Арлан. Аспорт усмҩаԥгатәқәа еиҿыркааит Аԥсны аҿари аспорти русқәа рзы Аҳәынҭқарратә еилакы.