АҞӘА, мшаԥы 17 - Sputnik. Аԥсны акультура аминистр Даур Ақаҩба Москваҟа усутә ныҟәарала дцеит, абри атәы аанацҳауеит акультура аминистрра аофициалтә Telegram-канал.
"Аныҟәарақәа рҳәаақәа ирҭагӡаны Аԥсни Урыстәылеи рыбжьара 2022 шықәса рзы акультура аусхк аҿы русеицура азҵаарақәа рылацәажәара азԥхьагәаҭан иҟоуп", - ҳәа аанацҳауеит адырраҭара.
Даур Ақаҩба Аԥсны акультура аминистрс дҟарҵеит мшаԥы 6 2022 шықәса рзы. Уаанӡа иара 2016 шықәса раахыс Адәныҟатәи аусқәа рминистрс дыҟан, абҵарамза 2021 шықәса рзы уи аҭыԥ аҟны иара диԥсахит Инал Арӡынба. Уи ашьҭахь Ақаҩба Аԥснытәи аҳәынҭқарратә университет жәларбжьаратәи аимадарақәеи аекономикатә зҵаарақәеи рзы аректор ихаҭыԥуаҩс дҟаҵан.
Ақаҩба иажәақәа рыла, имаҵура ҿыц аҿы иара атәыла акультура арҿиаразы ихы иаирхәалоит уаанӡа ирҳахьаз жәларбжьаратәи аимадарақәа.