АҞӘА, мшаԥы 19 – Sputnik, Бадраҟ Аҩӡба. Аслан Бжьаниа Никита Симаниан Аԥсны ашьапылампыл аҿиараҟны илагала дуи иааирԥшыз аспорт еихьӡарақәеи рзын ианеишьеит иреиҳаӡоу аҳәынҭқарратә ҳамҭа "Ахьӡ-Аԥша" аорден аҩбатәи аҩаӡара.
Аҳәынҭқарра ахада иазгәеиҭеит, Аԥсны еиԥш Асовет Еидгыла аҟынгьы ашьапылампыл аҿиараҟны злагала дуу, ашьапылампыласҩы ҳреспубликаҿы дшырдыруа бзиагь дшырбо.
Иара убас, Аслан Бжьаниа аспортсмен ҳамҭас ииҭеит аԥсуа ҳәызба.
Симаниан ҭабуп ахиҳәааит аҳәынҭқарратә ҳамҭазы, иазгәеиҭеит Аԥсны шизгәаҟьоу, гәахәарыла арахь дшаауа.
Иара Аԥсны ахада ҳамҭас ииҭеит ишәҟәы "Футбол - только ли игра?" иара убас, москватәи "Спортак" ацәаматәа аномер 9, Симониан ианиаамҭаз дызлақәгылоз аномер.