АҞӘА, мшаԥы 19 – Sputnik, Бадри Есиава. Гагра аусура иалагеит аспорттә комплекс ҿыц ҳәа Sputnik иазеиҭеиҳәеит Аԥсны аҿари аспорти русқәа рзы Аилак ахантәаҩы Џьемал Гәбаз.
"Ари аспорткомплекс иахьазы Аԥсны иҟоу иреиӷьуп. Гагра аспортшколҵәҟьа ыҟамызт. Иҟоуп иагқәоу: архьшәашәаратә система, ахәаԥшыҩцәа рҭыԥ, аха аҽазыҟаҵаразы ишьахәуп", - ҳәа иҳәеит Гәбаз.
Аилак аиҳабы иажәақәа рыла, арҭ рҩызцәа акомплексқәа ақалақьқәа рҿеиԥш араионқәеи ақыҭақәеи рыҿгьы иҟазароуп. Иара игәаанагарала, уи аҿар аспорт абзиабара днаркуеит, раамҭа агоит.
Аспорттә комплекс аҿы еиуеиԥшым аспортхкқәа: зых иақәиҭу аиқәԥара, абокс, самбо, дзиудо, карате рзы аицлабрақәа рымҩаԥгара алшоит. Гагра араион зегь аҟынтә аспортсменцәа аҽазыҟаҵара рылшоит.
Џьамал Гәбаз иҳәеит аспорткомплекс ақалақь ҳамҭас ишеиҭаз амеценат, анаплакҩы Алексеи Андронов. Аилак аиҳабы иажәақәа рыла, ареспублика иалшоит арҭ рҩызцәа ахыбрақәа рыргылара.
Аспорткомплекс аҿы имҩаԥысит мшаԥы 17 азы зых иақәиҭу ақәԥараз Аԥсны ачемпионат. Иара иаҭааит еицырдыруа аспортсменцәеи азыҟаҵаҩцәеи Алан Хугаеви Денис Царгәыши, иара убасгьы Европа ачемпион Рашь Хәытаба.
"Иабарбарыз ахәыҷқәа аҽаџьара арҭ рҩызцәа аспортсменцәа? Дара ирылшоит урҭ ирҿыԥшларц. Аилак ахь инаԥхьаны ҷыдала ҭабуп ҳәа расҳәеит раамҭа ахьҳақәдырӡыз", - ҳәа иҳәеит иара.
Аицлабрақәа ирылахәын Аԥсны араионқәеи ақалақьқәеи рҟынтәи шәҩык рҟынӡа аспортсменцәа.