АҞӘА, мшаԥы 22 - Sputnik. Акоронавирустә ҿкы зынӡа адунеи иқәӡааӡом, COVID-19 есымша иҟазаауеит, аамҭа-аамҭала аҿкы аҽышьҭнахлоит, абри азы РИА Новости аҟны аҳәамҭа ҟаиҵеит Роспотребнадзор Ацентр аепидемиологиеи адиагностикатә метод ҿыцқәеи рыҭҵаарадырратә гәыԥ анапхгаҩы Камиль Хафизов.
Иара иазгәеиҭеит, аҟазауаа ргәаанагарақәа шеиқәшәо, дара ирҳәоит акоронавирус есыша иҟазаауеит, адунеи аҟны аамҭа-аамҭала аҽышьҭнахлоит ҳәа.
"Акоронавирус зынӡа иныҵабоит ҳәа аҳәара иашам. Уи иҟамло усуп", - иҳәеит Хафизов.
Аепидемиа ҵысижьҭеи Аԥсны аҿкчымазара рыхьхьеит 53 604-ҩык. Аҿкчымазара зыдбалоу хҩык ачымазцәа Гәдоуҭатәи ахәшәтәырҭаҟны ишьҭоуп.