АҞӘА, мшаԥы 26 - Sputnik, Бадри Есиава. Гагра амца зкыз ауадарацәа змаз аҩны асааҭ 15:00 азы ирызмырцәаӡацызт ҳәа аанацҳауеит Аԥсны АҶА апресс-маҵзура.
Амцарцәаҩцәа ианнеи аамҭазы, аҩны аҩбатәи аихагыла ахәҭаки алаӷәреи амца иамҽханакхьан. Амцарцәагатә машьынақәа ԥшьба аус руан, аха амцабз ирласны аҩны зегь иахыҵәеит. 21-ы аҩны идәылыргеит аӡгьы ааха имоуӡеит", - рҳәеит аусбарҭаҿы.
Аԥсны АҶА апресс-маҵзураҿы иазгәарҭеит, амцарцәаҩцәа ишрылшаз анхацәа рмазара ахәҭак аиқәырхара, иара убасгьы ааигәа игылаз ахыбрақәа рахь амца нармышьҭит. Амца арцәара цәгьахеит аҩны аӷәы иахьалхыз иахҟьаны.
Иблыз аҩны аҟны инхоз Злата Симонова лгәаанагарала амцакра афымцацәаҳәақәа ирыхҟьазар ҟалоит.
Ауадарацәа аҭаны абарак ҟазшьа змаз аҩны ргылан 1930-тәи ашықәсқәа рзы, уаҟа инхон 20-ҩык инреиҳаны. Аҩны Аԥсны Агәабзиарахьчара аминистрра Ареспубликатә реабилитациатә центр абаланс аҿы иарбоуп. Шықәсқәак раԥхьа аҩны анхарҭазы ишәарҭаны ишьақәырӷәӷәан.
Аҩны иҩназ зегьы арҭ ашықәсқәа рызҵаара рыӡбап ҳәа иԥшын, изныкымкәа атәыла анапхгара рахь идҵаалахьан, аха лҵшәа рмоуит.