АҞӘА, мшаԥы 28 – Sputnik. Аԥсны-шьамтәылатә еизыҟазаашьақәа ҳәаақәызҵо адокументқәа рыдыркылт Аминистрцәа реилазаараҿы.
Арахь иаҵанакуеит аҿари аспорти русқәа рзы Аҳәынҭеилаки Шьамтәылатәи аспорттә Федерациеи рыбжьара абаҩырҵәыреи аспорти рзы аусеицураз Аиқәшаҳаҭра.
Аԥсны Акультура аминистрреи Шьамтәыла акультура аминистрреи рыбжьара аусеицуразы Аиқәшаҳаҭра анапаҵаҩраз апроект рыдыркылеит.
Акультура аминистр Даур Ақаҩба иҳәеит апроект Адәныҟатәи аусқәа, Аиустициа, Афинансқәа, Аекономика рминистррақәа шақәшаҳаҭу.
Иара убасгьы Аминистрцәа реилазаара иаднакылеит Аԥсны Аҳәынҭқарреи Шьамтәылатәи Арабтә республикеи рыбжьара аҳазалхратә усқәа рҿы аусеицуреи аицхыраареи рзы Аиқәшаҳаҭра ахада изынашьҭразы апроект.
Аԥсны Аҳәынҭқарра Аҳәынҭқарратә ҳазалхратә еилаки Шьамтәыла аҳазалхратә еилакы хадеи рыбжьара Аԥсны Аҳәынҭқарреи Шьамтәылатәи Арабтә республикеи рыбжьара еиҭарго атауарқәа рҳазалхратә хәыԥсазы адокументқәеи адыррақәеи реимдараз Аԥкаанҵеи Аԥсны Аҳәынҭқарра Аҳәынҭқарратә ҳазалхратә еилаки Шьамтәыла аҳазалхратә еилакы хадеи рыбжьара аилахәаахәҭразы астатистикатә дыррақәа реимдаразы Амеморандуми анапрыҵаҩра иазку аилацәажәара амҩаԥгараз ақәҵара апроектгьы рыдгалан.