АҞӘА, лаҵара 6 – Sputnik, Бадраҟ Аҩӡба. Аԥсны Аџьынџьтәылатә еибашьара алахәыла Владимир Иурченко иҳамҭақәа Владислав Арӡынба ихьӡ зху Ахьӡ-аԥша амузеи ҳамҭас иаҭоуп.
""Кипиш" ҳәа ахьӡ ҷыда иман. Аԥсны деицырдыруан. Еснагь длахҿыхын. Деибашьҩыҵәҟьан. Новочеркасскынтә даны Аԥсназы деибашьуан, ӷәӷәала дышхәызгьы Аҟәа агаразы аҵыхәтәантәи ажәылара ихы алаирхәит", - ҳәа еиҭеиҳәеит Амшынеиқәатәи аказақцәа рыр атаман, Аԥсны ауаажәларратә палата алахәыла Вадим Мироненко.
Иара иҳәеит Донбасс хатәгәаԥхарала еибашьуа рымш азы (лаҵара 6 - аред.) Аԥсынгьы иргәаладыршәалароуп ареспублика ахьчаразы хатәгәаԥхарала иааны еибашьуаз.
"Акыр шықәса Аԥсны дынхон, ихьуаз ичымазара иахҟьаны иԥсҭазаара далҵит Гагра", - иҳәеит Мироненко.
Иԥсымҭаз аветеран аҳәара ҟаиҵеит иҳәынҭқарратә ҳамҭақәа, иаҳәа, иҟама, иҟамчы Амузеи ахь ирырҭарц.
Амузеи адиректор Мзиа Беиаԥҳа илҳәеит лнапахьы инеиз аекспонатқәа ҳаҭырла ишрызныҟәахо, ахыбраҿы уи азы иахәҭоу аҭагылазаашьақәа шаԥҵоу.