АҞӘА, лаҵара 12 - Sputnik. Сынтәа аҵыҵындра аҽаҩра амаҷра иахҟьаны еиҵахоит Урыстәылаҟа ирышьҭуагьы ҳәа азгәаҭоуп Ахәаахәҭра-ааглыхратә палатаҿ иҟарҵаз анализ аҿы.
Апалата аҟазауаа рҭааит Гәылрыԥшьи Очамчыреи рраионқәа рҿы иҟоу 29 нхамҩа – аҵыҵындра ахьаадрыхуа. Аҭыԥ аҿы игәарҭеит ари аус атехнологиақәа ирыцу ауадаҩрақәа.
Афермерцәа ражәақәа рыла, аҽаҩра алаҟәра анырра арҭеит арҵәыгақәеи арԥхагатә конструкциақәеи рыхәԥсақәа рышьҭыҵреи аҳауатә ҭагылазаашьақәеи.
"Анхамҩақәеи анаплакқәеи рҭаара ашьҭахь иазырхиаз аинформациала сынтәа аҵыҵындра 1,2 нызқь тонна иреиҳахом. Аарыхра аиҳара аҩнуҵҟатәи аџьырмыкьаҿ ирҭиуеит", - ҳәа аҳәоит адырраҭараҿы.
Аҵыҵындра лассы иԥхасҭахо аалыҵуп, урыстәылатәи арегионқәа рахь агара ауадаҩрақәа ацуп. Уи адагьы Урыстәыла аладатәи акалҭ аҿы рхатәы аалыҵ рҭиуеит.
Абарҭ аҭагылазаашьақәа азгәаҭаны ААП Урыстәылаҟа аҵыҵындра аекспорт шеиҵахо атәы азгәарҭеит.
Апалатаҿ иазгәарҭеит анаплакқәеи анхамҩақәеи рҿы аҵыҵындра аарыхреиԥш егьырҭ ақыҭанхамҩатә культурақәа раарыхра ишалагаз.