АҞӘА, лаҵара 12 - Sputnik. Аҿар Жәларбжьаратәи рвидеофестиваль "Стәыла хәыҷы" афинал лаҵара 14 азы Ражьден Гәымба ихьӡ зху Аҳәынҭқарратә филармониаҿ имҩаԥгахоит ҳәа аанацҳауеит "Аԥсныпресс".
Аицлабра аҳәаақәа ирҭагӡаны 16 - 25 шықәса зхыҵуа, арҿиара знапы алаку аҿар ажиури иддырбароуп иҭырхыз афильм кьаҿ рыԥсадгьыл маҷ – рықалақь, рқыҭа ирызкны, еиҭарҳәароуп ари аҭыԥ аҭоурых, аҷыдарақәа.
Афестиваль аҿы иаиааиз иоуеит алшара Москватәи Аҳәынҭқарратә акультураз аинститут (МГИК) аҿы иалихуа афакультет хәыда-ԥсада аҭалара.
Аицлабра еиҿнакааит МГИК, Акультура, аспорт, аԥшӡара рмилаҭтә ассоциациа алахәны, адгылара арҭеит Аҟәа ақалақь ахадара, Аԥсны Акультура аминистрра, Жәларбжьаратәи акультура-усутә центр. Ауснагӡатәқәа мҩаԥгахоит аурыс-аԥсуа усеицура арҭбаара аҳәаақәа ирҭагӡаны.