АҞӘА, лаҵара 12– Sputnik. Агәабзиарахьчара аминистр Едурад Быҭәба Аԥсны амедиеҳәшьцәа рзанааҭтә ныҳәа рыдиныҳәалеит ҳәа аанацҳауеит аусбарҭа апресс-маҵзура.
"Раԥхьа иргыланы исҭахуп ҭабуп ҳәа шәасҳәарц акоронавирустә инфекциа аҿагылараҿ шәлагалаз. Аҳақьымцәа шәрывагыланы ҳтәылауаа ачымазара бааԥс иацәышәыхьчон", - ҳәа аҳәоит адныҳәалараҿы.
Быҭәба иазгәеиҭеит, аԥснытәи амедиеҳәшьцәа апандемиаан рыԥсҭазаареи ргәабзиареи ашәарҭара иҭаргыланы рнапынҵақәа шынарыгӡоз, Аԥсны ауааԥсыра амедицинатә цхыраара рыҭараҿы рылшамҭақәа шдуу.
Аминистр амедиеҳәшьцәа ирзеиӷьеишьеит агәабзиара, ақәҿиарақәа рнапы злаку аус аҿы.