АҞӘА, лаҵара 15 - Sputnik, Сариа Кәарцхьиаԥҳа. Аҟәа еихыршьалеит авидеофестиваль "Мояродинка" алҵшәақәа лаҵара 14 рзы.
Актәи аҭыԥ агеит Мариа Барцыц лусумҭа, аҩбатәи - Аелита Арутиуниан.
Афестиваль аиҿкааҩ Надежда Лысенко лажәақәа рыла, ажиури иалырхит аусумҭақәа ҩба.
"Актәи - Мариа Барцыц лусумҭа, лара иҭылхыз анҵамҭа даара ибзиан, уи аҿы иаарԥшын аҭоурых, аибашьра, иахьатәи аамҭа", - лҳәеит иара.
Лара иазгәалҭеит авидеофестиваль бзиаӡаны ишымҩаԥысыз.
"Агәыӷра сымоуп, иааиуа ашықәс азы алахәылацәа иҵегьы ишырацәахо, урҭ ари апроцесс иаҳа ҭакԥхықәрала иазнеип ҳәа", - лҳәеит Лысенко.
Авидеофестиваль "Мояродинка" аҿы 2022 шықәса рзы ицәырган аусумҭақәа 20 инареиҳаны.