АҞӘА, лаҵара 15 - Sputnik. Адгәыр Ԥачалиеи Даур Агәхааи рҽыҩқәа қәҿиарала иҩит Краснодартәи аҽырҩырҭаҿы имҩаԥысыз Аиааира Ду Амш Лаҵара 9 иазкыз аҽырыҩраҿы, абри атәы аанацҳауеит Аԥсны Аҿари аспорти рзы Аҳәынҭқарратә еилакы.
Аиԥхныҩларақәа аҩбатәи рымш азы идырхәмаруан хә-ҳамҭак англызи араби шьа злоу аҽқәа рыбжьара. Ара раԥхьаӡа акәны иалахәу ҩышықәса зхыҵуа аҽқәа рзы "Аԥышәаратә" храҿа дырхәмаруан.
Адгәыр Ԥачалиа иҽыҩ "Аԥсны Голд" ари аиԥхныҩлараҿы актәи аҭыԥ агеит, иахысит 1000 метра иҟаз абжьаӡара араб шьа злоу ҩышықәса зхыҵуа аҽыҩқәа рыбжьара.
Аџьа амш иазкыз 1600 метра иҟаз абжьаӡараҿы ашьацқьа злоу англыз ҽқәа рыбжьара ахԥатәи аҭыԥ ааннакылеит Даур Агәхаа иҽы "Абхазиан Сонг".