АҞӘА, лаҵара 16 – Sputnik. Аԥснытәи акаратист қәыԥшцәа Геленџьык карате кекусинкаи (кумите) азы аицлабрақәа рҿы актәи аҭыԥқәа 11 ргеит ҳәа аанацҳауеит Аԥсны аҿари аспорти русқәа рзы Аилак.
Ахьтәы медалқәа реиԥш жәҩык аспортсменцәа аҩбатәи аҭыԥқәа ныркылеит, хәҩык ахԥатәи аҭыԥқәа ргеит.
Аԥснытәи акоманда иалаз аспортсменцәа 8 -17 шықәса рхыҵуеит. Аҟәантәи фҩык ыҟан, Очамчырантә - фҩык, Агәӡера - 13 ҩык.
Геленџьык имҩаԥысуаз атурнир иалахәын 150-ҩык аспортсменцәа Краснодар, Геленџьык, Армавир, Шәача, Новороссиск, Батаиск, Волгоград, астаницақәа Бриуховецкаиеи Аԥсни рҟынтәи.