АҞӘА, лаҵара 16 - Sputnik. Renault урыстәылатәи амазара аҳәынҭқарра иахатәхеит ҳәа аанацҳауеит Урыстәыла Ааглыхратә хәаахәҭра аминистрра.
"Анапы зҵаҩу аиқәшаҳаҭрақәа иазԥхьагәарҭоит Renault акциақәа Москва ақалақь ахь риасра, "АВТОВАЗ" акциақәа — аҳәынҭқаррахь риасра Урыстәыла Ааглыхратә хәаахәҭра аминистрра анапаҵаҟа иҟоу ФГУП "НАМИ", - аҳәоит адырраҭараҿы.
Ахәҭақәа абасеиԥш еихшоуп:
ИАЕ "Рено Россия" 100% акциақәа – Москва Аиҳабыра;
Автоконцерн "АвтоВАЗ" (аилахәыра Renault Group иахәҭакуп 2016 шықәса аахыс) 67,69% акциақәа - Урыстәыла Ааглыхратә хәаахәҭра аминистрра анапаҵаҟа иҟоу ФГУП "НАМИ");
"АвтоВАЗ" егьырҭ акциақәа- аилахәыра "Ростех".
Аусбарҭа иазгәанаҭеит франциатәи автоконцерн "АвтоВАЗ" аҿы ахәҭа фышықәса рыҩнуҵҟа иаанахәар шалшо.
"АвтоВАЗ" азауадқәа ыҟоуп Толиаттии Ижевски. Дара Урыстәыла автомашьынақәа Lada рҭыжьра иацырҵоит, иара убас Renault автомашьынақәа рымаҵ рулоит.