АҞӘА, лаҵара 22 - Sputnik. Лаҵара 20-21 рзы Шәача имҩаԥысуаз 1941-1945 шш. рызтәи Аџьынџьтәылатә еибашьра Дуӡӡаҟны игаз Аиааира 77 шықәса ахыҵра иазкыз абокс азы аицлабрақәа рҿы аԥснытәи аспортсменцәа аиааирақәа ргеит. Абри атәы аанацҳауеит Аҿари аспорти рзы аҳәынҭеилакы.
Владимир Маршьан ихьӡ зху Абокси, аиқәԥареи, атлетика ласи Рреспубликатә хәыҷтәы-қәыԥштә школ ааӡамҭацәа актәи аҭыԥқәа быжьба ааныркылеит.
Ахьтәы медалқәа ириааит: Қьамал Возба, Аинар Хынҭәба, Баграт Ҵурҵумиа, Сандро Ҵәыџьба, Никита Џьанба, Аинар Парцваниа, Арсени Џьидариан. Аспортсменцәа азыҟарҵоит Иракли Ҵурҵумиа, Олег Тарасов.
Атурнир иалахәуп иара убас гәдоуҭатәии бзыԥҭатәии абоксиорцәеи Аҟәа ақалақь ахадара Аҿари аспорти русқәа абокс асекциа аспортсменцәеи, урҭ актәи аҭыԥқәа хԥеи аҩбатәи ҭыԥки ааныркылеит.
Гәдоуҭатәи аспортсменцәа ракәзар, ахьтәы медалқәа хԥа ириааит - Аинар Малиа, Владислав Амҷба, Дауҭ Хагәышь. Аспортсменцәа азыҟарҵоит Арнольд Гәбази Алиас Агрбеи.