АҞӘА, лаҵара 23 - Sputnik. Ашәуа драматә театр агастрольқәа мҩаԥгахоит Аԥсны ақалақьқәа рыҟны ҳәа аанацҳауеит Акультура аминистрра.
Ҟарачы-Черкесстәи ареспублика аҳәынҭқарратә ашәуа драматә театра Аԥсныҟа иаауеит аспектакль "Амҳаџьырқәа рышьҭала" рыманы. Аспектакль дырбахоит Гәдоуҭа, Тҟәарчал, Гагра, Аҟәа лаҵара 24 инаркны 28 нӡа.
Агастрольқәа рҳәаа иҭагӡаны Гәдоуҭеи Гагреи, Аҟәеи иқәгылоит Ҟарачы-Черкесстәи ареспублика аҳәынҭқарратә филармониаҿ еиҿкаау акәашаратә театр "Меркури".
Иҳаҩсыз амчыбжь азы, Аԥсны акультура аминистр Даур Ақаҩба зхадараҿы дыҟаз аделегациа Ҟарачы-Черкесск иаҭааит, ауаажәларратәи аполитикатәи аусзуҩ Тарас Шамба игәаларшәараз имҩаԥысуаз ахәалԥаз рҽаладырхәырц. Имҩаԥысит Аԥсни Ҟарачы-Черкесски акультура аминистрцәа реиԥылара, иара убас акыр аусутә еиԥыларақәа.