АҞӘА, лаҵара 24 – Sputnik. Акультура-усуратә платформа "Гәыма" аҟны Ковач ихьӡ зху амузыкатә школ ацхыраараз агәыҳалалратә концерт мҩаԥысит лаҵара 24 рзы.
"Ихадоу, аконцерт аҟынтәи аҵаҩцәа агәахәара роур ауп. Апандемиа аамҭаз иалагалаз апкрақәа ирыхҟьаны дара акыраамҭа ахәаԥшцәа раԥхьа иқәгылартә алшара рымамызт", - иҳәеит школ адиректор Михаил Алхазов.
"Убри аан, акыр ҳзеизгар ҳашкол арҽеиразы аусурақәа ирыцаҳҵоит", - иҳәеит иара.
Ас еиԥш иҟоу аусурақәа амузыкатә школ аҟны изныкымкәа имҩаԥыргахьеит. Уаанӡа аҵаҩцәеи арҵаҩцәеи злахәыз агәыҳалалратә концерт мҩаԥыргахьан Пицундатәи ауахәама ауарӷан зал аҟны.
Ковач ихьӡ зху Аҟәатәи амузыкатә школ ахыбра 120 шықәса ахыҵоит. Асовет аамҭақәа инадыркны араҟа аиҭашьақәыргыларатә усурақәа мҩаԥырымгаӡацт. Иҟоуп зынӡа еилаҳаз аклассқәа.
Аҵыхәтәантәи аашықәса раахыс ашкол анапхгара Аҟәа акультура аусбарҭа ацхыраарала рҽазыршәоит ахыбра аиҭашьақәыргылара. Аха афинанс цхыраара ахьырмауа иахҟьаны аусурақәа зхыркәшамхеит.
Алхазов иажәақәа рыла, акырынтә ашкол аиҭашьақәыргылараз Аинвестпрограмма алаҵара рҽазыршәеит, аха илыҵшәадахеит.
"Зны Аинвестпрограмма ааныркылеит, зны ҳара ҳҟынӡа имааӡеит. Иҟалап уи иаҳагьы иаҳзеиӷьхазар. Избанзар, ҳара хәыҷы-хәыҷла ҳаҿуп иахәҭоуп ҳәа ишаҳаԥхьаӡо ала, раԥхьатәи ахаҿра мԥсахӡакәан", - иҳәеит иара.
Ашкол аҭоурыхтә хыбра архитектуратә баҟоуп. Иара иргылеит архитектор Синицын 1902 шықәсазы абырзен ҭуџьар Дмитри Комнино идҵала. Аԥхьа ара иаартын апансион "Эллада", ареволиуциа ашьҭахь, 1917 шықәсазы – арҵаҩратә семинариа. Асеминариаҿ рҵаҩцәас иҟан XX ашәышықәса алагамҭа иатәыз аԥсуа интеллигенциа –Дырмит Гәлиа, Самсон Ҷанба уҳәа егьырҭгьы.
Ԥыҭрак анаҩс ахыбра арҵаҩратә техникумын, нас – амузыкатә школхеит.