АҞӘА, лаҵара 24 - Sputnik. Авокалистцәеи аконцертмеистерцәеи реиндаҭлара лаԥшьгамҭоуп Аԥсни Урыстәылеи жәлар рартистка, Урыстәыла Аҳәынҭқарратә аԥхьахә занашьоу Хьыбла Герзмааԥҳа ҳәа аҳәоит аоператә шәаҳәаҩы л-Telegram-канал аҿы.
Аиндаҭлара иалнаршоит иқәыԥшу авокалистцәа Хьыбла Герзмааԥҳа лгәыҳалалратә фонд еиҿнакаауа аконцертқәа рылахәхареи еицырдыруа аоператә сценақәа рахь рнеиреи.
"Аҟыбаҩ змоу аҿар рзы аиндаҭлара шьаҭаркхоит. Иаиааиз ашәқәа рзаартхоит аоператә театрқәа рахь, ираҳҭоит алшара дуқәа. Аоператә артистцәа қәыԥшцәа, XXI ашәышықәса артистцәа аоператә культура иреиӷьу атрадициақәа дырҿиалароуп", - ҳәа лҳәоит ашәаҳәаҩ.
Аиндаҭларақәа ирылахәхар ҟалоит 18 -35 шықәса зхыҵуа, апрофильтә ҵара змоу ма истуденту.
Аиндаҭлара мҩаԥгахоит иара убасгьы амузыкатә ҵара ҷыда змоу аконцертмеистерцәеи астудентцәеи рыбжьарагьы (22 – 35).
Арзаҳалқәа рыдыркылоит рашәара 1-30 рзы, онлаин аиндаҭлара асаит ҷыдаҿ. Ԥхынҷкәынмзазы ирылаҳәахоит аиндаҭлара иалахәхар зылшо 16-ҩык авокалистцәеи 16-ҩык аконцертмеистерцәеи рыхьӡқәа. 2023 шықәса ажьырныҳәамзазы имҩаԥгахоит аиндаҭлара хаҭеи агала-концерти.
Аԥхьахәтә фонд - 6 700 000 мааҭ, иара убасгьы хаҭала Хьыбла Герзмааԥҳа лаԥхьахә.
Авокалистцәа жәларбжьаратәи реиндаҭлара аексперттә жиури напхгара алҭоит Хьыбла Герзмааԥҳа.