АҞӘА, лаҵара 28 - Sputnik. Аԥснытәи аҽыҩқәа Краснодар аҽырыҩраҿы аиааирақәа ргеит, абри атәы аанацҳауеит Аҿари аспорти русқәа рзы Аҳәынҭқарратә еилакы.
Аиԥхныҩларақәа 18 рҿы еивасуан ашьацқьа злоу араԥ, англыз, ахалтекин ҽқәа. Урҭ рыбжьара иҟоуп аԥснытәи аҽааӡаҩцәа Ахра Ашәбеи Адгәыр Ԥачалиеи рҽыҩқәа.
2400 метра иҟоу абжьаӡараҿы иҩуан ԥшьышықәсеи еиҳани изхыҵуа араԥ ҽыҩқәа. Уи иалахәын Ахра Ашәба иҽыҩқәа ҩба - Сириус аԥшьбатәи аҭыԥ агеит, Вронски - аҩбатәи.
Адгәыр Ԥачалиа иҽыҩ араԥ шьа злоу Аԥсны Голд 1200 метра иҟоу абжьаӡараҟны раԥхьа инеит, Аԥхынтәи ахраҿагьы иаиааит.