АҞӘА, рашәара 1 – Sputnik. Аԥсны Апарламент адепутатцәа Урыстәылеи Аԥсни рҳәаа ахысра армариаразы ажәалагалақәа ирылацәажәеит ҳәа аанацҳауеит Апарламент апресс-маҵзура.
"Ажәалагала аус адааулеит Урыстәылатәи Афедерациа анапхгара рахь аҳәара аҟаҵаразы – Ԥсоу аӡиас иху ажәытә цҳаи иарахьы анеирҭақәеи еиҭарҿыцзарц. Ари ажәалагала анагӡара иалнаршоит атранспорт хархәагақәа, аекскурсиатә автобусқәа, ашьаҟауаа реихшара. Аҳәааҿ иоурышьҭуа рхыԥхьаӡара еиҳа иацлоит", - иҳәеит адепутат Ерик Рштуни.
Иара убасгьы иҳәеит аԥснытәи аган рашәара 1 инаркны цәыббра 30 рҟынӡа аҳәаахьчаратә хылаԥшра аинспекторцәа, апаспорттә хылаԥшырҭа кабинақәа, аныҟәаратә цәаҳәақәа рхыԥхьаӡара иацҵазарц ажәалагала ҟарҵеит.
"ААҬ иҿыцӡоу ахархәагақәеи апрограмматә еиқәыршәареи, апаспорттә гәаҭара автоматизациатә системагьы налаҵаны, рыла еиҿкаазарц ҳҳәеит", - иҳәеит апарламентари.
Адепутат Алхас Барцыц иҳәеит аԥснытәи аган аԥснытәии урыстәылатәии аганқәа рхаҭарнакцәа злахәу аусутә комиссиа аԥҵазарц ажәалагала шыҟарҵаз.
"Асеиԥш иҟоу агәыԥ излауала ирццакны иаԥҵатәуп, урыстәылатәи ҳколлегацәа Агәаҭара-аушьҭратә ҭыԥ ахь рааираан рылала аҭагылазаашьа рбарц. Аусутә гәыԥ еиуеиԥшым азҵаарақәа рҭыԥ рықәҵара рнапы ианылоит", - иҳәеит иара.
Агәыԥ алахәылацәа аҳәынҭқарратә ҳәаа ахысра армариара иалацәажәаны, иҭҵааны, анагӡаразы иахәҭахо ауснагӡатәқәа рыдыркылоит.