АҞӘА, рашәара 1 – Sputnik, Асмаҭ Ҵәыџьԥҳа. Аԥкьаҭасраз иаарту ахәыҷтәы турнир рашәара 1 азы Аҟәа иаартхеит.
Атурнир иалахәуп ақәратә категориақәа ҳԥа рыла 60-ҩык: 9 шықәса рҟынӡа, 9-10, 11-13 шықәса зхыҵуа рхы ԥыршәон.
Аԥкьаҭасыҩцәа хәыҷқәеи Аԥсны ахәыҷқәа зегьи аныҳәамш рыдиныҳәалеит Москва Аҩны анапхгаҩы Александр Бигәаа.
"Ишәзеиӷьасшьоит насыԥ зцу, гәырҩа змам ахәыҷра. Шәыччаԥшь ахаангьы шәхы-шәҿы иқәымҵааит, агәабзиара шәымазааит. Агәабзиара ӷәӷәа шәыманы ишәызҳарц шәыбҩа шәырҵәлароуп. Аспорт хәарҭара ду амоуп, уи азы иҳаӡбеит абри аҩыза атурнир шәзеиҿаҳкаарц. Сақәгәыӷуеит, есышықәса итрадицианы иҟалап ҳәа", - иҳәеит иара.
Аԥкьаҭасраз аклуб "Аҟәа" адиректор Беслан Ашәба агәыӷра ааирԥшит арҭ рҩызцәа атурнирқәа лассы-лассы имҩаԥгахалап ҳәа.
Атурнир аадыртит чирлидинг "Cheerio" алахәылацәа акробатикатә ҟазшьа змаз рыкәашарала.
Атурнир рашәара 6 рҟынӡа имҩаԥысуеит.