АҞӘА, рашәара 1 – Sputnik. "Газпром" даниатәи аилахәыра Orsted Salg & Service, германиатәи аилахәыра Shell Energy Europe агаз рзынашьҭра иаҟәыҵит", - ҳәа аанацҳауеит аилахәыра апресс-маҵзура Telegram-канал аҿы.
Адырраҭараҿы иарбоуп агазтә еилахәыра лаҵара 31 рзы Урыстәыла ахада иусԥҟа №172 инақәыршәаны агаз мшаԥымзатәи ахә амоуӡеит ҳәа.
"Газпром" иазгәанаҭеит 2021 шықәсазы аилахәыра Orsted Salg & Service ҩ-миллиард кубометрак агаз шазынашьҭыз – ари Даниа ахы ианархәо агаз 2/3 ахәҭоуп, "Газпром экспорти" Shell Energy Europe Limited реилаӡара иазԥхьагәанаҭоит Германиаҟа шықәсык аҩнуҵҟа 1,2 миллиард кубометрак агаз анашьҭра.
Владимир Путин иусԥҟа инақәыршәаны мшаԥы 1 инаркны урыстәылатәи агаз, иаҩызам атәылақәа рзынашьҭраан ахә мааҭла иршәалазарц ишьақәыргылоуп. Асхема ҿыц мап ацәкра Урыстәыла аилаӡарала ахыдҵақәа рынамыгӡара акәны иахәаԥшуеит, агаз аиуразы "Газпромбанк" аҿы валиутала амааҭ аархәалароуп.
Ари мап ацәызкыз Болгариа, Польша, Финлиандиа, Нидерландқәа реилахәырақәа агаз рзынашьҭра аанкылоуп.