АҞӘА, рашәара 1 - Sputnik. Харитон Агрба Авак Узлиан дииааит Москва имҩаԥысуаз абокс ахәылԥаз аҟны, Евразиатәи абокс азы апарламент ачемпион ҳәа атитулгьы иоуит.
Аԥсуа боксиор 10 раундк ицоз ақәгылара мҩаԥигеит ашоу "Лига Ставок. Вечер профессионального бокса" аҿы. Аиҿкааҩцәа уи ддырбон YouTube аҿы.
Аиндаҭлара анхыркәшаха арефери ирылеиҳәеит еицҿакрыла Харитон Агрба аиааира шианашьоу. Ари аԥсуа спортсмен апрофессионалтә ринг аҿы ажәбатәи ииааироуп.
Харитон Агрба – жәларбжьаратәи акласс аспорт азҟаза, атитулқәа WBA-Fedecaribe, WBA Continetal, IBF European имоуп, 2019 шықәса раахыс апрофессионалтә ринг аҿы дықәгылоит: жә-қәгыларак рҟынтәи хәба рҿы нокаутла даиааихьеит.