АҞӘА, рашәара 4 - Sputnik. Ари аамҭа иалагӡаны 20 нызқьҩык иреиҵамқәа Аԥсны акоронавирус азы алаҵа ҟарҵеит ҳәа аарыцҳауеит Аԥсны Агәабзиарахьчара аминистрра.
Аусбарҭа адыррақәа рыла, рашәара 3 рҟынӡа ареспубликаҟны COVID-19 азы алаҵа ҟарҵеит 19 090-ҩык ауааԥсыра. Урҭ рахьынтәи 10 625-ҩык "Спутник V" ҟарҵеит, 8 465-ҩык - "Спутник Лайт".
Акоронавиурс азы алаҵаҟаҵара иалагеит 2021 шықәса лаҵарамза алагамҭазы. Алаҵа ҟарҵоит урыстәылатәи апрепаратқәа "Спутник V", "Спутник Лайт".
Апандемиа ҵасызыр аахыс Аԥсны COVID-19 зыхьыз рхыԥхьаӡара 53,6 нызқьҩык рҟынӡа инаӡоит, 683-ҩык рыԥсҭазаара иалҵит. Аҵыхәтәантәи ҩымз раахыс аҿкчымазара аҟынтәи зыԥсҭазаара иалҵыз ҳәа аӡәгьы ашәҟәы дҭагалаӡам.