АҞӘА, рашәара 4 - Sputnik, Асмаҭ Ҵәыџьԥҳа. Аашықәса зхыҵуа аԥснытәи аԥқьаҭасҩы Нестор Цужба "Аԥқьаҭаз Академиа J-PRO ахраҿаз аԥхьахәқәа" аицлабраҿ ахьы медал игеит ҳәа Sputnik иазеиҭалхәеит иазыҟаҵаҩ Елизабет Акуциа.
Лара лажәақәа рыла, Нестор ԥшьышықәса анихыҵуаз инаркны аԥқьаҭ дасуеит, аицлабрақәа рыҟны еснагь аиааира хықәкыс имоуп .
"Уфа аицлабрақәа ралагамҭазы Нестор дычмазыҩхеит, ашоура иман, аха имчқәа зегь еибыҭан илшамҭақәа ааирԥшит. Ихәмарра аҩаӡара ҳаракын. Афинал аҟны ахәмарра зегь рыла ицәгьан, аха илшеит", - лҳәеит лара.
Азыҟаҵаҩ иазгәалҭеит аицлабра ишалахәыз зынӡа 16-ҩык аспортсменцәа.