АҞӘА, рашәара 8– Sputnik, Асмаҭ Ҵәыџьԥҳа. Апарламенттә еилакқәа ԥшьба реилазаара аԥсахрақәа аларгалеит Жәлар Реизара аилатәараҟны ахаша, лаҵара 8 рзы.
Апарламент адепутат Асҭамыр Гьерхьелиа Аграртә политикеи, аԥсабаратә лшарақәеи, аекологиеи рзы аилак аҟынтәи Аекономикатә политикеи, ареформақәеи, аинформациатә технологиақәеи рзы Аилак ахь диасуеит.
Адепутат Леонид Лакербаиа лаҵарамза 14 рзы аиҭалхрақәа раан аиааира згаз, апарламенттә еилақәа ҩба дрылахәуп - Абиуџьет, акредиттә еиҿкаарқәа, ашәахтәқәеи афинансқәеи рзы аилак, Асоциалтә политикеи, аџьеи, агәабзиарахьчареи, адемографиеи, аибашьра аветеранцәеи аинвалидцәеи русқәеи рзы Аилак.
Зынӡа Жәлар Реизараҟны иаԥҵоуп апарламенттә еилакқәа жәба.