АҞӘА, рашәара 11 – Sputnik. Рашәара 10 рзы Ҟрым иаатит аԥсыӡ чашылеи аԥсыӡ хәшеи ахьыҟарҵо азауад.
Азауад аргылара иалахәын аԥснытәи аинвесторцәа ҳәа аанацҳауеит Аԥсны Аекономика аминистрра апресс-маҵзура.
Аартра иалахәын Аԥсны аԥыза-министр ихаҭыԥуаҩ, аекономика аминистр Кристина Озган зхадараҿы дыҟоу аԥснытәи аделегациа.
"Ҳара ҳреспубликақәа еиднакылоит ижәытәӡоу акультуреи аҭоурыхи, ҳажәларқәа ирхыргахьоу агәырҩа цәгьеи. Ауадаҩрақәа зегьы ҳриааины иахьа ҳара алшара ҳамоуп ԥхьаҟа ацара, арҿиара", - лҳәеит Озган.
Азауад ухыки-ҽнаки рыла иалнаршоит 350 тонна аӡа аус адулара.
Анаплакы х-хәҭакны аус аулоит:
аԥсыӡ чашыла аҟаҵара,
аҟашәа аҟаҵара.
аԥсыӡ хәша "Омега-3" аҭыжьра.
Анаплакы анапхгаҩцәа ражәақәа рыла, аиԥш зеиԥшу азауад иахьатәиала Урыстәыла џьаргьы иҟаӡам.