АҞӘА, рашәара 12 - Sputnik. Аԥсны аҩнуҵҟатәи аусқәа рминистр Инал Арӡынба урыстәылатәи иколлега Сергеи Лавров Урыстәыла Амш идиныҳәалеит, абри атәы аанацҳауеит Амедиацентр.
Иара инаҵшьны иазгәеиҭеит ари амш ишаанарԥшуа милаҭрацәала ибеиоу Урыстәыла жәлар ракзаара, уи символра шазнауа ҳаамҭазтәи урыстәылатәи аҳәынҭқарра.
"Урыстәылатәи ауаажәларра фундаменталтә шьаҭақәас есымша ирыман апатриотизм, аҭынчреи, ахақәиҭреи, аиашареи рзы ақәԥара. Исымоу алшара схы иархәаны агәрагара аасырԥшуеит ҳтәылақәа рыдәныҟаполитикатә усбарҭақәа русеицура наҟ-наҟгьы активла ишымҩаԥысло", - ҳәа азгәеиҭеит Арӡынба.
Иахьа уажәаԥхьа Аслан Бжьаниа Владимир Путин Урыстәыла амш идиныҳәалеит, агәрагарагьы ааирԥшит Аҟәеи Москвеи реимадарақәа наҟ-наҟгьы аилибакаареи аҳәынҭқаррабжьаратә еиҿцәажәарақәеи рыла ишырӷәӷәахо.