АҞӘА, рашәара 13 – Sputnik. Урыстәыла ахада Владимир Путин Наталиа Поклонскаиа Россотрудничество аиҳабы ихаҭыԥуаҩраҟынтә лхы дақәиҭтәуп. Абри азы аусԥҟа кьыԥхьуп азинтә информациа аофициалтә интернет-портал аҿы.
"Поклонскаиа Наталиа Владимир-иԥҳа Ихьыԥшым Амилаҭқәа Реидгылеи аҳәаанырцә инхо аџьынџьуааи русқәеи жәларбжьаратәи агуманитартә усеицуреи рзы Афедералтә маҵзура анапхгаҩы ихаҭыԥуаҩ имаҵураҟынтәи лхы дақәиҭтәзааит", — ҳәа ануп адокумент аҿы.
Поклонскаиа аҳәамҭа ҟалҵеит лмаҵура дахьамырхыз даҽа усурак ахь дахьыиаргаз азоуп ҳәа, аҳәынҭқарра ахада иҭабуп ҳәа иалҳәеит иаарԥшыз агәрагареи адгылареи рзы.
Наталиа Поклонскаиа диит Украина, аус луан Ҟрым еиуеиԥшым апрокурортә маҵурақәа рҟны. Еиҳа деицырдыруа дҟалеит Ҟрым Урыстәыла ианадла ашьҭахь Ҟрым апрокурорс даныҟарҵа инаркны.
2016 шықәса рзы Поклонскаиа апартиа "Иаку Урыстәыла" аҟынтәи Аҳәынҭқарратә Дума дадепутатын. 2021 шықәса жьҭаарамзазы лара дҟаҵан Кабо-Верде иҟоу Урыстәыла Аҷыдалкаатәи Азинмчы змои ацҳаражәҳәаҩыс, 2022 шықәса рзы - Россотрудничество аиҳабы ихаҭыԥуаҩс.