АҞӘА, рашәара 14 – Sputnik. Гәдоуҭатәи ахәыҷтәы акәашаратә театр "Аураашьа" "Кремльтәи аеҵәахәқәа" афестивал аҟны Гран-прии актәи аҭыԥқәа ҩбеи иаиааит, абри атәы Sputnik иазеиҭалҳәеит аколлектив анапхгаҩы ихаҭыԥуаҩ Џьулета Шамба.
"Ҳхәыҷқәа кремльтәи ахан аҟны ықәгылеит. Афестиваль аҟны ирыдаагалеит ҩ-кәашарак: аҿар рыкәашареи, амҳаџьырцәа рыкәашареи. Афестиваль аиҿкааҩцәеи ахәаԥшцәеи иԥханы ҳрыдыркылеит, ршьапы иқәгыланы рнапқәа ҳзеинырҟьон", - лҳәеит Шамба.
Гәдоуҭатәи акәашаратә театр "Аурашьа" Кремль имҩаԥысуаз афестиваль аҟны Гран-при иаиааит
© Foto / Валерий Тания
Афестиваль-аицлабра "Кремльтәи аеҵәахәқәа" иалахәын 50 коллектив. Гәдоуҭатәи акәашацәа гран-при инаваргыланы аԥаратә ҳамҭагьы ранашьахеит.
"Аураашьа" напхгара аиҭоит Аԥсни Ҟарачы-Черқьес Жәлар рартист Валери Ҭаниа.