АҞӘА, рашәара 17 - Sputnik. Аԥсны Адәныҟатәи аусқәа рминистрра аусзуҩцәа хҩык атәыла ауааԥсыра ааныркылеит, иагьрымархит анаркотикатә маҭәашьарқәа рацәаны ҳәа аанацҳауеит Аԥсны ААР апресс-маҵзура.
Приморск ақыҭан ААИ иааныркылаз амашьына аҩнуҵаҟа иԥшаан илагоу амаҭәашьар згәылаԥсаз аилаҳәырақәа. Уи адагьы амашьына аԥсҟы зкыз 57 шықәса зхыҵуа Роланди Џьелиа икаижьырц иҽазишәеит даҽа еилаҳәырак, уи аҩнуҵаҟа даҽа 16 еилаҳәыра анаркотикатә маҭәашьарқәа згәылаз.
Аекспертиза ишьақәнаргылеит аилаҳәырақәа ҩ-хкык ззин ыҟам метадони мефедрони шыргәылаз.
Амашьына арныҟәцаҩи апассаџьырцәа - 26 шықәса зхыҵуа Саид Сабекиеи 27 шықәса зхыҵуа Беслан Адлеибеи рганахь ала ашьаус хацдыркит анаркотикатә маҭәашьарқәа закәаншьаҭада раахәара, рымазаара, рымҩангара шьаҭас иҟаҵаны.
Аӡбарҭа аӡбарала Роланди Џьелиа аҩнытә баандаҩра иқәҵоуп, Беслан Адлеибеи Саид Сабекиеи ҭакуп.