АҞӘА, рашәара 17 – Sputnik, Бадраҟ Аҩӡба. Аԥснытәи аҳақьымцәа, COVID-19 аламырҵәара иазааԥсоз, "Ахьӡ-Аԥша" аорден ахԥатәи аҩаӡарақәа ранаршьеит. Абри атәы иҳәеит Аԥсны ахада Аслан Бжьаниа Амедицина аусзуцәа рымш иазкны имҩаԥгаз аусмҩаԥгатә аҟны дықәгыло.
Иреиҳаӡоу аҳәынҭқарратә ҳамҭақәа ирыԥсахеит Анжела Арҷелиаԥҳа, Алла Белиаева, Давид Бжинаа, Херсина Гәлиаԥҳа, Ирма Каҷарааԥҳа, Сариа Лакәаԥҳа, Викториа Тарԥҳа, Иана Хәарцкьиаԥҳа.
"Шәара шәзанааҭ аҳаҭыр ду, ауаҩра зцу занааҭуп. Гәык-ԥсык ала зегьы иҭабуп ҳәа шәасҳәоит шәџьабаазы, хамеигӡарыда имҩаԥыжәго шәусуразы, ишәыду ауалԥшьа еилкааны шәахьазнеиуазы. Шәзанааҭ ԥсшьара аздырӡом. Иахьа шәара шәахьтә аӡәырҩы шәзанааҭтә ныҳәа аусураҿы иазгәашәҭоит", - ҳәа иҳәеит аҳәынҭқарра ахада.
Аслан Бжьаниа иаликааит аҿкчымазара аамҭазы аҳақьымцәа ирбаз аџьабаа атәы.
"Тәамҩахә ҟамҵакәа шәҭаацәа шәыҽрыгыжьны ачымазцәа рыԥсҭазаара аиқәырхара шәазықәԥон. Сара иацы Аԥсны Жәлар Реизарахь иҟасҵаз анашьҭымҭаҿы исҳәеит, COVID-19 агәабзиарахьчара асистемазы ԥышәара дуны ишыҟалаз. Ҳарҭ иҳалшоз зегьы ҟаҳҵеит ачымазцәа рыхәшәтәразы ахәшәтәырҭатә усбарҭақәа зыда ԥсыхәа ыҟам амаҭәахәқәа рыла реиқәшәараз", - иҳәеит Бжьаниа.
Атәыла ахада иҳәеит аҳәынҭқарра аринахысгьы иахьынӡалшо агәабзиарахьчара аусхк ацхыраара шанаҭало. Ахәҭакахьала иазгәеиҭеит аиҭашьақәыргыларатә усурақәа шазгәаҭоу Иҷыдоу апсихоневрологиатә хәшәтәырҭаҟны, иара убас Ареспубликатә хәыҷтәы хәшәтәырҭа аргылара.
Амедицинатә усзуҩцәа иааиуа рныҳәамш рыдиныҳәалеит агәабзиарахьчара аминистр Едуард Быҭәба.
Азанааҭеидгыла ареспубликатә хеилак ахантәаҩы Марина Шьанааԥҳа амедицина аусзуҩцәа ҭабуп ҳәа раҳәо аҳаҭыртә шәҟәы ианалшьеит агәабзиарахьчара аминистр Едуард Быҭәба.
Анаҩс еизаз зегьы ргәалаҟазаара шьҭыхуа рҿаԥхьа иқәгылеит аԥсуа естрада шәаҳәаҩцәеи акәашаратә коллективқәеи.