АҞӘА, рашәара 19 - Sputnik. Ԥшь-раундк ицоз аиқәԥара алҵшәақәа рыла аԥснытәи абоксиор Харитон Агрба аиааира игеит ҳәа азиԥхьаӡеит аӡбаҩ.
Агрба дықәгылоит урыстәылатәи акоманда даланы 68 рҟынӡа зыкапан ыҟоу рыбжьара. Иара диақәԥон Намибиантәи аспортсмен Бернхард Бернард.
Уаанӡа Харитон Агрба ҩынтә аиааира игахьан ҩ-еиԥыларак рҟны - венесуелатәи аспортсмен Мичел Марканои узбектәи абоксиор Бобо-Усмон Батурови данреисуаз.
"Аинтерконтиненталтә храҿа" иазықәԥоит Урыстәыла, Африка, Азиа, Америка ркомандақәа. Аиндаҭлара мҩаԥысуеит мчыбжьык ахьынтәи знык, анаҩстәиқәа мҩаԥгахоит рашәара 11, 18, 25 рзы.
Харитон Агрба – жәларбжьаратәи акласс аспорт азҟаза, атитулқәа WBA Fedecaribe, WBA Continetal, IBF European имоуп, 2019 шықәса раахыс апрофессионалтә ринг аҿы дықәгылоит.