АҞӘА, рашәара 21 - Sputnik. 27 метра аҳахаракырантәи аԥшырҭатә ҭыԥ ргылахоит Афонҿыцтәи аҳаԥы азааигәара ҳәа Sputnikакорреспондент еизеиҭеиҳәеит аргылара иаҿу аԥшәма, анаплакҩы Саид Званбаиа.
"Сашьа Соломон Званбаиеи сареи иаҳаӡбаз усуп. Афонҿыц – ари акурорт ҭыԥуп, адунеи акыр акурорт қалақьқәа рыҟны асеиԥш иҟоу аԥшырҭа ҭыԥқәа гылоуп, уантәи аԥсабара аԥшӡара иаҳа иубарҭоуп. Араҟа иҟало 27 метра аура аиуеит", - иҳәеит иара.
Званбаиа иажәақәа рыла, абааш аихала еибыҭахоит, ахықә иавыргажьаны ҩ-плошьадкак ҟалоит, иара убас иаҭахоит ацәанырра ӷәӷәа бзиа избо рзы исаркьалыху абарҵақәа ҩба. Аҭааҩцәа лифтла ихалалаоит. Апроект автор архитектор Сократ Воуба, аусурақәа нарыгӡоит аҭыԥантәи аҟазауаа. Анаплакҩы аргылара еиҳагьы Афон ҿыц аԥсшьаҩцәа аднаԥхьалап ҳәа агәыӷра имоуп.
Аԥшырҭатә бааш аартра ԥхынгәымза анҵәамҭазы иазгәаҭоуп. 12 шықәса рҟынӡа зхыҵуа ахәыҷқәа рзы ахалара хәыда-ԥсадахар алшоит, адуцәа рзы абилеҭ 200-300 мааҭ иаԥсахоит.