АҞӘА, рашәара 21 - Sputnik. Урыстәылатәи аҳазалхыҩцәа закәаншьаҭада Аԥснынтәи иалыргоз 1250 ҭоԥ асигарет ааныркылеит ҳәа ааицҳауеит Краснодартәи аҳазалхырҭа шәачатәи амаҵзура апресс-маӡаныҟәгаҩ.
АҬ "Адлер"аҿы аҳазалхыҩцәа агәаҭаразы иааныркылеит агәрамгара ззаадырԥшыз автомашьына "Даймлер Крайслер".
Автомашьына агәаҭара иахыжьын амобилтә ахылаԥшра-гәаҭагатә комплекс ала. Иаарԥшын амашьына иатәымыз ашәытарақәа рыҟазаара.
"Амашьына агәаҭара ашьҭахь ашә акәырша анамырх иаарԥшын аҳазалхыҩцәа ирцәыҵәахыз аҭыҭын аалыҵ. Асигаретқәа ҵәахын амашьына аԥшьшәык рыҩнуҵҟа", - иҳәеит аҳазалхратә ҭыԥ аиҳабы и.н. Антон Александров.
Амашьына иҭыргеит 1250 ҭоԥ асигарет (25000 цыра) аԥснытәи акцизтә дыргақәа рықәҵаны. Атауар Урыстәыла аҭиразы аҳәаа иахыргон.
Аконтрабандатә тауари атранспорттә хархәагеи ырбаандаҩуп. Административтә зинеилагараз аус хацыркуп.
Ашықәс иаалагазар закәаншьаҭада аҭыҭын аалыҵ аҳәаа ахыгара аҽазышәаразы Краснодартәи аҳазалхырҭа 150 ус хацнаркхьеит.