АҞӘА, рашәара 23 - Sputnik. Европатәи Апарламент бжьеиҳала аӡбара рыдыркылеит ЕЕ алахәылараз акандидатра Украинеи Молдавиеи ирыҭазарц, Қырҭтәыла мап ацәкын ҳәа аанацҳауеит РИА Новости.
"Европарламент даҽазныкгьы Евроеидгыла асаммит аанаԥхьеит ЕЕ алахәылараз акандидатра Украинеи Молдавиеи ирыҭазарц, Қырҭтәыла ари аганахьала аусура иацҵазарц", - аҳәоит арезолиуциа атекст.
Арезолиуциаз рыбжьы рҭиит Европарламент 529-ҩык алахәылацәа, 45-ҩык аҿагылеит, 14-ҩык рҽааныркылеит.
Аилатәара иалагаанӡа европатәи адипломатиа ахада Жозеп Боррель Қырҭтәыла мап ацәкра гәхьаас иамкырц иҳәеит атәыла зну амҩа шиашоу, иахәҭоу аусурақәа шымҩаԥыргаша.
Кандидатцәас ирыдыркылаз атәылақәа аекономикатә реформақәа рымҩаԥгара, аолигархра аԥыхра уҳәа ирызку аусмҩаԥгатәқәа аус рыдырулароуп.