АҞӘА, рашәара 28 – Sputnik, Асмаҭ Ҵәыџьԥҳа. Аҳәынҭқарратә харадҵара Аԥсны Иреиҳаӡоу аӡбарҭа иаднагалеит Амҳаџьыраа рыԥшаҳәаҿы аҭыԥ змаз хҩык ауаа рышьразы ашьаус аршаҳаҭгақәа.
Аӡбарҭахь инаган автоматқәеи урҭ рыхәҭақәеи ажьакцеи аҷышәи рыманы. Дара ҭыгоуп иблыз автомашьына Toyota Mark 2 (ахарадҵара агәаанагарала, абри автомашьыналоуп ацәгьоура аҭыԥ ахь изланеиз, иагьызлабналаз ашьра зуз ахаҿқәа. Амашьына Депо араион аҿы иблын– аред.) аҟынтәи.
Апрокуратура хада иара убасгьы иҭахаз Шамбеи Аҩӡбеи ирылаз ахқәа аӡбарҭа иадыргалеит.
Аӡбарҭатә процесс хыркәшам. Аҩыратә ршаҳаҭрақәа рыҭҵаара мҩаԥысуеит.
2019 шықәса абҵара 22 азы акриминал алахәылацәа Асҭамыр Шамба, Алхас Аҩӡба, ақьафурҭа ахәынаҳаҩ Доминика Ақырҭааԥҳа рышьреи, Русҭам Шамбеи Шамил Аҩӡбеи рышьразы аҽазышәареи рхараҵоуп ацәгьоуцәа ргәыԥ аиҿкааҩцәа Ерик Ҷкадуеи, Беслан Бганбеи, агәыԥ алахәылацәа Даҭо Ахалаиеи, Демур Ахалаиеи, Аслан Блаббеи.
Иара убасгьы ацәгьоуцәа закәаншьаҭада абџьар ахархәареи, атәым мазара хықәкыла ааха аҭареи рзы ахара рхарарҵоит.
Ерик Чкадуа атранспорттә хархәагақәа–Mercedes-Benz, Lexus GX рӷьычра ихарарҵоит.