АҞӘА, рашәара 29 - Sputnik. Аҩбатәи Жәларбжьаратәи аоператә фестиваль "OPERA VIVA" мҩаԥгахоит ԥхынгәы алагамҭаз Аԥсны ҳәа аанацҳауеит Акультура аминистрра апресс-маҵзура.
Афестиваль аатуеит ԥхынгәы 5 асааҭ 20:00 рзы Аԥсуа драматә театр аҿы. Иара уа ԥхынгәы 6 асааҭ 20:00 рзы имҩаԥгахоит аконцерт "Piano Duo". Афестиваль аркра иазку аконцерт иалагоит ԥхынгәы 7 асааҭ 17:00 рзы Пицундатәи ауахәамаҿы.
Афестиваль иалахәхоит Давид Терзиан напхгаҩыс дызмоу Аԥсны акамертә оркестр, Нора Џьынџьалԥҳа напхгаҩыс дызмоу ахортә капелла, Адыгеиатәи аҳәынҭқарратә симфониатә оркестр, Чаиковски ихьӡ зху Москватәи аҳәынҭқарратә консерваториа Акамертә хор.
Аоператә ариақәа нарыгӡоит: Нинель Бжьаниаԥҳа, Гәлиза Аҩӡԥҳа, Нана Черқьезиаԥҳа, Алхас Ферзба, Асҭамыр Кәыҵниа, Кристина Ешԥҳа, Сирануш Гаспариан, Атеатр ду аоператә труппа асолист Бехзод Давронов. Аконцерт далахәуп ауарӷанарҳәаҩы Лука Гаделиа.